Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
<<Dem. 18.137 | Dem. 18.139 (English) | >>Dem. 18.141 |
18.138μυρία τοίνυν ἕτερʼ εἰπεῖν ἔχων περὶ αὐτοῦ παραλείπω . καὶ γὰρ οὕτω πως ἔχει . πόλλʼ ἂν ἐγὼ ἔτι τούτων ἔχοιμι δεῖξαι , ὧν οὗτος κατʼ ἐκείνους τοὺς χρόνους τοῖς μὲν ἐχθροῖς ὑπηρετῶν , ἐμοὶ δʼ ἐπηρεάζων εὑρέθη . ἀλλʼ οὐ τίθεται ταῦτα παρʼ ὑμῖν εἰς ἀκριβῆ μνήμην οὐδʼ ἣν προσῆκεν ὀργήν , ἀλλὰ δεδώκατʼ ἔθει τινὶ φαύλῳ πολλὴν ἐξουσίαν τῷ βουλομένῳ τὸν λέγοντά τι τῶν ὑμῖν συμφερόντων ὑποσκελίζειν καὶ συκοφαντεῖν , τῆς ἐπὶ ταῖς λοιδορίαις ἡδονῆς καὶ χάριτος τὸ τῆς πόλεως συμφέρον ἀνταλλαττόμενοι · διόπερ ῥᾷόν ἐστι καὶ ἀσφαλέστερον ἀεὶ τοῖς ἐχθροῖς ὑπηρετοῦντα μισθαρνεῖν ἢ τὴν ὑπὲρ ὑμῶν ἑλόμενον τάξιν πολιτεύεσθαι .
καὶ τὸ μὲν δὴ πρὸ τοῦ πολεμεῖν φανερῶς συναγωνίζεσθαι Φιλίππῳ δεινὸν μέν , ὦ γῆ καὶ θεοί , πῶς γὰρ οὔ ; κατὰ τῆς πατρίδος · δότε δʼ , εἰ βούλεσθε , δότʼ αὐτῷ τοῦτο . ἀλλʼ ἐπειδὴ φανερῶς ἤδη τὰ πλοῖʼ ἐσεσύλητο , Χερρόνησος ἐπορθεῖτο , ἐπὶ τὴν Ἀττικὴν ἐπορεύεθʼ ἅνθρωπος , οὐκέτʼ ἐν ἀμφισβητησίμῳ τὰ πράγματʼ ἦν , ἀλλʼ ἐνειστήκει πόλεμος , ὅ τι μὲν πώποτʼ ἔπραξʼ ὑπὲρ ὑμῶν ὁ βάσκανος οὗτος ἰαμβειοφάγος , οὐκ ἂν ἔχοι δεῖξαι , οὐδʼ ἔστιν οὔτε μεῖζον οὔτʼ ἔλαττον ψήφισμʼ οὐδὲν Αἰσχίνῃ περὶ τῶν συμφερόντων τῇ πόλει . εἰ δέ φησι , νῦν δειξάτω ἐν τῷ ἐμῷ ὕδατι . ἀλλʼ οὐκ ἔστιν οὐδέν . καίτοι δυοῖν αὐτὸν ἀνάγκη θάτερον , ἢ μηδὲν τοῖς πραττομένοις ὑπʼ ἐμοῦ τότʼ ἔχοντʼ ἐγκαλεῖν μὴ γράφειν παρὰ ταῦθʼ ἕτερα , ἢ τὸ τῶν ἐχθρῶν συμφέρον ζητοῦντα μὴ φέρειν εἰς μέσον τὰ τούτων ἀμείνω .
18.139
Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
<<Dem. 18.137 | Dem. 18.139 (English) | >>Dem. 18.141 |